एघार चेली कतार नियोगको शरणमा

प्रेम लामा /

दोहा– वैदेशिक रोजगारीको सिलसिलामा नेपालका विभिन्न जिल्लावाट कतार आई सरसफाई (क्लिनिङ्ग)को काम गर्दै आइरहेका १० जना नेपाली चेलीहरू घर फर्काइदिनका लागि पहल गरिदिन आग्रह लिएर गत आइतवार नियोगको शरणमा आएका छन् ।

दुतावास आएकामध्ये पाँच जना चेलीहरु विगत ३ वर्षदेखि सो कम्पनीमा कार्यरत रहँदै आइरहेका थिए भने पाँच जना नयाँ चेलीहरु मात्र ७ महिनादेखि कार्यरत थिए । दुतावासको पहलमा उनीहरूका कम्पनी मालिक बोलाई समस्या समाधानको प्रयास गरिएको छ । पिडित चेलीहरू आफ्नै खर्चमा टिकटको ब्यवस्था गरी यसै साता मुलुक फर्कने योजनामा रहेका छन् ।

ती चेलीहरुले विरामी हुँदा समेत आराम गर्न नदिने र औषधी खाएर काम गर्न लगाउने, समयमा घर नपठाउने जस्ता समस्या रहेको उजुरी दुतावासमा गरेका थिए । उनीहरु एकैसाथ भागेर नियोग आएका हुन् । उनीहरुलाई आफ्नो डिउटी सकेपछि पनि पार्टटाईमको रुपमा घर घरमा घरेलु कामदारको रुपमा पठाउने गरेको पिडीत चेलीहरुले बताए । ओमसलाल अलिस्थित क्याम्पको भौतिक अवस्था जिर्ण रहेको र त्यहाँ असुरक्षित महसुस हुँदै आएको उनीहरूको भनाई थियो । १७ दिनदेखि पानी नआएको र मस्जिदमा गएर पानी ल्याएको एक पिडितको दुखेसो थियो ।

नेपालबाट आएको सात महिना मात्र भएका पिडीत चेलीहरुमा सिन्धुलीकी २० वर्षिय सुशिला वाईवा, झापाकी २३ वर्षिया रिता मुर्मु, चितवनकी २९ वर्षिय सुनिमाया श्रेष्ठ, वुटवलकी २३ वर्षिया सरस्वती थापा क्षेत्री र कपिलबस्तुकी २८ वर्षिया शान्ता न्यौपाने रहेका छन् । त्यसैगरी सोही कम्पनीमा विगत तीन वर्षदेखि कार्यरत रहँदै आएका पाँचजना चेलीहरुमा नवलपरासी दलदलेकी ३० वर्षिया गंगा माया सारु, झापाकी ३० वर्षिया तारा पाण्डे, वुटवलकी २५ वर्षिया सुनिता विक, नवलपरासीकै २२ वर्षिया ऋतु कुमारी महतो र सुनसरीकी २८ वर्षिया कञ्चन कुमारी चौधरी रहेका छन् ।

पिडीत चेलीहरुको भनाई अनुसार उनीहरु पहिला एक भारतीयको मातहतमा काम गर्दै आएका थिए । पछि ती भारतीयले उनीहरूलाई कतारी स्पोन्सरलाई जिम्मा लगाएका थिए । केही चेलीहरुले नोभेम्वर महिनाको तलब र जनवरी महिनाको ओभर टाईमको तलव नपाएको बताएका छन् । अन्य तलव र ओभरटाइम भने उनीहरूले पाएका छन् ।

त्यसैगरी घरेलु कामदारको रुपमा १ वर्ष अघि कतार आएकी झापा झिलझिले–४ की गोमा प्रसाई पनि नियोगको शरणमा शनिवार आएकी छन् । उनलाई पनि घर मालिक्नीले घर जान नदिएपछि नियोग आएको बताइन् । उनलाई ७ सय रियालमा घरेलु कामदारको रुपमा उनकै दाई पर्नेले दोहा ल्याएको बताइन् । उनी कुवेतमा समेत ५ वर्ष घरेलु कामदारको रुपमा काम गरेर उनी दोहा आएकी थिइन् । अघिल्लो साता मात्र नियोगमा आएकी पिडीत चेली विराटनगर महेन्द्रचोककी बसन्ती राजवंशी नेपाल फर्किसकेकी छन् ।

Posted on : June 19, 2012, 6:34 am

Source :