Nepalarab : A Gulf Nepalese Representative Site, Daily News, Information, Literature & many more...

Editorial-Archive ! News-Archive ! Article-Archive ! Interview-Archive ! Poem-Archive ! Comedy-Archive ! Movies

अनुगमन निकाय महालेखापरीक्षकको कार्यालयकै दुर्गति

काठमाडौं, असार असार २० । राष्ट्रको सम्पत्ति मितव्ययी एवम् प्रभावकारीरुपमा उपयोग भए–नभएको अनुगमन गर्ने निकाय महालेखापरीक्षकको कार्यालयका ४५० जना कर्मचारी जीर्ण भवनका कारण त्राहीत्राही भएर काम गर्न बाध्य भएका छन् ।
बबरशमशेर राणाले निर्माण गरेको राणाकालीन भवनमा रहेको महालेखापरीक्षकका कार्यालयका पर्खाल नराम्ररी चर्किएका छन् भने काठेदलिन पनि मक्काएर भाँच्चिने अवस्थामा पुगेको छ । बबरमहलमा अवस्थित उक्त कार्यालयले आधा शताब्दी पार गरिसकेको छ । नब्बे, ४५ र ६८ सालको भूकम्प बेहोरेको बूढो भवन अब भने कुनै पनि बेला ढल्ने त्रास बढेको उपमहालेखापरीक्षक सोमराज पोखरेल बताउछन् । आफ्नै भवन नभएका कारण सडक विभागसँग मिलेर बबरशमशेरको महलको एक भागमा रहेको उक्त कार्यालयलाई अविलम्ब स्थानान्तरण गर्नुपर्नेमा उनको जोड छ ।

कार्यबाहक लेखापरीक्षकको नेतृत्वमा उक्त कार्यालयका विशिष्ट श्रेणीका अधिकारी भवन निर्माणका लागि आवश्यक रकमको जोहो गरिदिन अर्थ मन्त्रालयमा हार गुहार गरिरहेका छन् तर उपलब्धि भने शून्य नै छ । ‘लामो प्रयासपछि रु १२ लाख प्राप्त भयो तर त्यो हात्तीको मुखमा जिरासरह भयो’ सरकारले केही समयअघि महालेखापरीक्षकको कार्यालय भवनका निम्ति ज्ञानेश्वर सानो गौचरणमा पाँच रोपनी २ आना जग्गा जुटाइदिएको र त्यहाँ रु ६५ करोडको लागतमा अत्यधुनिक सुविधासम्पन्न १० तले भवन निर्माण गर्ने योजनाका लागि प्राप्त रकमबारे जानकारी दिँदै उनले भने ।

सहरी विकास तथा भवन निर्माण विभागका प्राविधिकले अहिलेको कार्यालय कुनै पनि बेला भत्कन सक्ने चेतावनी दिएको स्मरण गर्दैै उनी अर्थ मन्त्रालयले दिएको रु १२ लाख ‘बिल्डिङ स्केच एन्ड डिजाइनिङ’ का निम्ति उक्त विभागलाई नै प्रदान गरिएको बताउछन् । आगामी वर्षको बजेटमा महालेखापरीक्षकको कार्यालय निर्माणका लागि कम्तीमा रु ६५ करोड विनियोजन गर्न अनुरोध गरिएको उनी बताउँछन् । छ वर्षदेखि प्रमुख नपाएको उक्त संवैधानिक निकायका कर्मचारी जीर्ण भवनमा बसेर काम गर्दा सधैँ भयभीत छन् र कति बेला दुर्घटनाको सिकार भइएला भन्ने चिन्ताले पिरोलिएका छन् ।

अर्थमन्त्री वर्षमान पुनलाई भवनको जीर्ण अवस्थाबारे जानकारी गराउनाका साथै भूइँचालोले भत्काएको र चर्काएको भवनका भित्ता र दलिन देखाइएको जानकारी दिँदै उपमहालेखापरीक्षक विमला सुवेदीले उनबाट सकारात्मक जवाफ प्राप्त भएको बताए । महालेखापरीक्षकको कार्यालयको भवन निर्माणका निम्ति आवश्यक रकम विनियोजन गर्न अर्थमन्त्रीले सक्दो सहयोग गर्ने आश्वासन दिएको उल्लेख गर्दै उनले अर्थसचिवलाई पनि भवनको जीर्णावस्थाबारे जानकारी रहेको जनाए । बबरमहलको अर्को भागमा रहेको सडक विभागले भने जुम्ला–सुर्खेत सडक निर्माणका लागि छुट्याइएको रकम खर्चेर मर्मतसम्भार गरी आफूलाई जोखिमबाट मुक्त गरेको बताइएको छ ।

Posted on : July 4, 2012, 5:06 am

Source :

Post your comments:

Comments on topic:

Your Name:

Your Email:

Verification Code: [Type the number from image]

Your Comment: