मेघालयमा नेपालीभाषी माथिको ज्यादती

Solidaritykhabar's Editorial

मेघालयमा नेपालीभाषी माथिको ज्यादती : विशेष सम्पादकीय
+ Font Size | - Font Size Bookmark and Share
Solidarity Reporter - 2010-06-20 23:06:14

नेपाली भाषी हुँदैमा सुतिइरहेका बेला जिउादै जलाइन्छ, लखेटिन्छ, कुटिन्छ, पिटिन्छ, पढ्न, लेख्न, हिड्न, बोल्न, जिउनमै बन्देज लगाइन्छ यो कस्तो बिडम्बना ? भारतको मेघालयवासी नेपालीहरुमाथि त्यही हुँदैआएको छ । तर, सरकार चुपचाप छ । वास्तवमा यो चोट मेघालयवासी नेपालीको मात्रै होइन सारा संसारभरका नेपालीमाथिको चोट हो । नेपाली भाषीमाथिको आक्रमण हो । तर, जो बोल्नपर्छ त्यो बोल्दैन, मात्रै औपचारिकता पुरा गर्न खोजिरहेको देखिन्छ ।

भारतको पूर्वोत्तर राज्य आसाम, मेघालयमा नेपाली भाषीहरुले पीडा खेप्न परेको यो पहिलो घटना भने होइन । यसअघि २०४५ सालमा पनि यस्तै भएर लाखौं नेपाली भाषीहरु बिस्थापित हुन बाध्य भएका थिए । हालै त्यहाँका अल्पसख्यक नेपाली जाति र भाषीहरु त्यहाँको स्थानिय खासी समुदायको आक्रमणमा परे जसबाट १७ जनाभन्दा बढी नेपालीहरुको ज्यान गइसकेको छ । यस्तो दर्दनाक घटनाका सम्बन्धमा परराष्ट्र मन्त्रालयले औपचारिकताका लागि मात्रै बिज्ञप्ति निकालेको छ । भारतमा रहेको नेपाली दूतावास मौन रहेको छ जुन खेदजनक छ ।

भारतले आफ्नो आन्तरिक मामिला भन्दै नेपाललाई नबोल्न चेतावनी दिनु आपत्तिजनक छ । के हामीहरु नेपाली जाति र भाषीमाथिको आक्रमण टुलुटुलु हेरेर बस्ने ? नेपालको आन्तरिक मामिलामा के गर्ने कसो गर्ने भनेर उपदेश दिइरहने भारतले यस्तो गम्भीर मामिलामा नेपाललाई नबोल्न चेतावनी दिनु नेपाली जातिमाथि नै धावा बोल्नु हो कि होइन ? यस्तो अबस्थामा हामी किन नबोल्ने ? हामीलाई जवाफ चाहिएको छ । त्यहाँका नेपालीले एक थप्पड खाँदा हाम्रो गाला दुख्छ, भारतमा बस्ने नेपाली लखेटिदा अमेरिकामा बस्ने नेपालीको छाती पोल्छ । यसरी नबोली बस्नु भाइचारा, राष्ट्रियता, भाषा, जातीयताप्रतिको घात हुन जान्छ ।

घटनाक्रम यसरी बढाइएकी खासी समुदायका नाममा बढाइएका ज्यादतीहरु लगायतका बिभिन्न क्रियाकलापले नेपाली भाषीमाथिको आक्रमण नियोजित त होइन भन्ने प्रश्न उब्जन थालेको छ । यस्तो बिषयमा सरकार नबोलेकोमा बुद्धिजीवी, राजनैतिक दलका नेता, बिश्लेषकहरुले गम्भीर आपत्ती जनाएका छन् भने धेरैले नेपालीहरुप्रति सहानुभूति जनाएका छन् । यस घटनाको बिरुद्धमा अझै धेरै ऐक्यबद्धता जनाउनुपर्ने, संगठित हुनुपर्ने र यो क्रम नरोकिए घटनालाई अन्तर्राष्ट्रियकरण गर्नुपर्ने जरुरी भइसकेको छ ।

नेपालीहरुमाथि ज्यादती भइरहादा देशका प्रधानमन्त्री भारतीय राजदूतसाग सो बिषयमा एक शब्द पनि नबोली सत्ताको बिषयमा मात्रै छलफल गरे । कुरा उठाउनुपर्ने व्यक्तिले यस्तो व्यवहार गर्नु जति निर्लज्जता अरु के हुनसक्छ ? आगामी दिनमा सबै नेपालीहरुले जवाफ खोज्ने बेला आएको छ, नेपाली भाषी कतिसम्म हेपिइरहने ? कतिसम्म खेदिइरहने ? कतिसम्म बिभेद र हेपाहा प्रबृत्तिको शिकार भइरहने ? यसको जवाफ सम्बन्धित निकायले दिनैपर्छ यतिबेला ।

देशका मूलधारका सबै राजनैतिक दलहरुले भातृसंगठनलाई मात्रै परिचालित गर्ने होइन खुला रुपमै आधिकारिक आवाज उठाउने हिम्मत गर्नैपर्छ । अनि देश बिदेशमा रहेका सबै नेपालीहरुसम्बद्ध संघ संगठनहरु यस बिषयमा जाग्नैपर्छ । नेपाली जाति र भाषीको आत्मसम्मानमा खलल पुर्‍याउने क्रियाकलाप गर्छ भने कडा बिरोध गर्न सबैले सक्नैपर्छ चाहे त्यो जोसुकै किन नहोस्, जस्तोसुकै शक्ति किन नहोस् । हामीलाई हाम्रो भाषा, जाति निकै प्यारो छ जति अरुलाई उनीहरुको छ ।

Posted on : July 24, 2010, 6:24 am

Source :http://www.solidaritykhabar.com/news.php?cid=833

• First
• 2
• 3
• 4
• 5
• ...
• LAST